Մայիսի 15-ը` Կլիմայի միջազգային օր

Ժամանակակից աշխարհում կլիմայի պահպանումը կարևորագույն հիմնախնդիրներից է: Մայիսի 15-ը նշվում է որպես կլիմայի պահպանման միջազգային օր: Այս տոնը հաստատվեց ի պատասխան օդերևութաբանների` կիմայի, որպես հետագա սերունդների բարեկեցության վրա ազդող կարևոր գործոնի, պաշտպանության կոչին:

Գլոբալ տաքացումը, մթնոլորտում օզոնի քանակի ավելացումը, բնական աղետները, Երկիր մոլորակում եղանակային պայմանների փոփոխությունները հանգեցնում են Երկրի կլիմայի փոփոխմանը: Կլիմայի փոփոխությունը բացասական ազդեցություն է ունենում մարդկանց ունեցվածքի և պարենամթերային անվտանգության վրա: Այն բացասական ազդեցություն է ունենում բնական ռեսուրսների և պետությունների հավասարակշռված զարգացման վրա: 

Երկրի ջերմաստիճանի բարձրացման հետևանքով տեղի են ունենում կլիմայի աղետային փոփոխություններ: Սակայն ժամանակակից գիտությունը չի կարող հստակ պատասխանել, թե ինչ արագությամբ տեղի կունենան այդ փոփոխությունները: Օդերևութաբանները և բնապահպանները պնդում են, որ մարդկությունն ի վիճակի է այդ փոփոխությունները հետաձգել:

Մթնոլորտում ջերմոցային գազերի կենտրոնացումը կլիմայական փոփոխություններ առաջացնող հիմնական պատճառներից  է: Առաջին անգամ այս խնդիրը միջազգային մակարդակով քննարկվել է 1992 թ. Ռիո դե Ժաներոյում տեղի ունեցած Երկրի Գագաթնաժողովում: Ավելի քան 180 երկրների ներկայացուցիչներ ստորագրում են Կլիմայի փոփոխության մասին ՄԱԿ-ի շրջանակային կոնվենցիան: Այս համաձայնագիրը որոշում է մթնոլորտում ջերմոցային գազերի քանակի Երկրի վրա ծագումնաբանական ազդեցություններ չառաջացնող մակարդակի կայունացման ուղղությամբ պետությունների գործունեության հիմնական քայլերը:

1997 թ. վերջում Կիոտոյում տեղի է ունենում կիմայի փոփոխությանը նվիրված երրորդ գիտաժողովը: Գիտաժողովում ստորագրվում է Կիոտոյի հայտնի արձանագրությունը: Կիոտոյի արձանագրությունը միջազգային պայմանագիր է, որը պարտավորեցնում է զարգացած և անցումային տնտեսությամբ երկրներին 2008–2012թթ. ընթացքում  կրճատել կամ հավասարակշռել ջերմոցային գազերի արտանետումները:

10 տարի անց` 2007թ. Դեկտեմբերին, Բալիում տեղի ունեցավ կլիմայի փոփոխություններին նվիրված ՄԱԿ-ի նոր գիտաժողովը: Գիտաժոովին մասնակցում էին ավելի քան 190 երկրների ներկայացուցիչներ: Բալիում գիտաժողովի արդյունքում ստորագրվում է համաձայնագիր, որը կոչ է անում երկրների ղեկավարներին միջոցներ ձեռնարկել առևտրաարդյունաբերական սեկտորի կողմից ածխաթթու գազի արտանետումների կրճատման համար:

Երկրի կլիմայի պահպանումը կախված է մեր մոլորակի յուրաքանչյուր բնակչից: Նման կարևոր գործում մեզնից յուրաքանչյուրը կարող է ներդրում ունենալ: Այս առումով կարելի է կրճատել ավտոմեքենաների օգտագործումը, բնակարաններում օգտագործել էներգիա խնայող լույսի աղբյուրներ, մասնակցել ծառատունկերին, պահպանել կանաչ տարածքները: Թվում է, թե այս ամենը ընդամենը մանրուքներ են, իրականում հսկայական նշանակություն կունենան, եթե կիրառվեն Երկիր մոլորակի ամբողջ բնակչության կողմից:

Հարցեր, պատասխաններ, մեկնաբանություններ